🇮🇳 स्वातंत्र्य दिनी वडूथच्या सुपुत्राला ‘उत्कृष्ट सेवा पदक’चा सन्मान

WhatsApp Group Join Now

Telegram Group Join Now

Instagram Group Join Now

वडूथ –

पोलीस हवालदार रोहित दिलीप तोरसकर यांचा पालकमंत्री शंभूराज देसाई यांच्या हस्ते गौरव

वडूथ : देशाच्या स्वातंत्र्य दिनाचे औचित्य साधत वडूथ येथील सुपुत्र पोलीस हवालदार श्री. रोहित दिलीप तोरसकर यांना त्यांच्या उत्कृष्ट व उल्लेखनीय पोलीस सेवेसाठी भारत सरकारच्या गृह विभागातर्फे ‘उत्कृष्ट सेवा पदक’ प्रदान करण्यात आले. सातारा जिल्ह्याचे पालकमंत्री मा. शंभूराज देसाई यांच्या हस्ते हा सन्मान प्रदान करण्यात आला.

कर्तव्यनिष्ठा, प्रामाणिकपणा, शिस्त, समर्पणभाव आणि उत्कृष्ट सेवेसाठी रोहित तोरसकर यांची या मानाच्या पदकासाठी निवड झाली आहे. स्वातंत्र्य दिनाच्या पवित्र दिवशीच हा सन्मान मिळणे ही त्यांच्या सेवेला मिळालेली विशेष दाद असून वडूथ गावासाठीही ही अभिमानाची बाब आहे.

रोहित तोरसकर हे स्वभावाने अतिशय मनमिळावू, आपुलकीने वागणारे आणि मदतीची भावना असलेले व्यक्तिमत्त्व म्हणून गावात परिचित आहेत. गावातील नागरिकांना अडचणीच्या प्रसंगी पोलीस खात्यामार्फत आवश्यक ती मदत मिळवून देण्यासाठी त्यांनी नेहमीच पुढाकार घेतला आहे. सर्वसामान्य नागरिकांच्या समस्या समजून घेऊन त्यांना योग्य मार्गदर्शन करण्याची त्यांची नेहमीच भूमिका राहिली आहे.

पोलीस सेवेत कर्तव्य बजावत असतानाच गावातील नागरिकांशी जपलेली आपुलकी आणि अडचणीच्या काळात मदतीला धावून जाण्याची वृत्ती यामुळे रोहित तोरसकर यांच्याबद्दल ग्रामस्थांमध्ये विशेष आदर आहे.

स्वातंत्र्य दिनाच्या दिवशी मिळालेल्या या गौरवामुळे त्यांच्या कुटुंबीयांसह वडूथ ग्रामस्थ, मित्रपरिवार आणि पोलीस सहकाऱ्यांमध्ये आनंदाचे वातावरण आहे.

कर्तव्याला प्रामाणिकपणे वाहून घेतलेल्या आणि आपल्या मातीशी नाते जपत समाजासाठी सदैव मदतीचा हात पुढे करणाऱ्या रोहित दिलीप तोरसकर यांचे मनःपूर्वक अभिनंदन! 🇮🇳💐

WhatsApp Group Join Now

Telegram Group Join Now

Instagram Group Join Now